Дар Ӯзбекистон мансабдори баландпояи ВКД кушта шуд
Дар Ӯзбекистон сардори яке аз шӯъбаҳои ВКД Дилшод Акрамов дар утоқи кории худ кушта шуд. Дар ин хусус рӯзи якшанбе нашрияи интернетии маҳаллӣ nuz.uz хабар дод. Тибқи иттилои нашрия ҳодисаи мазкур бегоҳии рӯзи шанбе ба вуқуъ пайвастааст.
«Акрамов бо захмҳои кордӣ дар утоқи кории бинои шӯъбаи полис ёфт гардид. Маълум аст, ки ҳодисаи мазкур худкушӣ нест ва аз рӯи ҳодиса тафтишот шурӯъ гардид», иттилоъ медиҳад нашрияи nuz.uz.
Дилшод Акрамов мансаби сардори сарраёсати хадамоти патрулии дидбонӣ ва ҳифзи тартиботи ҷамъиятии ВКД Ӯзбекистонро бар ӯҳда дошт, ки аз аввалҳои моҳи июли соли ҷорӣ ӯ ба ин мансаб таъйин гардидааст. То ба ин дам ӯ шӯъбаи профилактикаи ҳуқуқвайронкунӣ сарраёсати корҳои дохилии шаҳри Тошкандро идора мекард. Тибқи иттилои норасмии истифодабарандагони ӯзбек забони Фейсбук, дар замони идоракунии шӯъбаи профилактикаи ҳуқуқвайронкунӣ СРКД — и шаҳри Тошканд, ӯ нисбати диндорон дар бофтани парвандаҳои ҷиноӣ фаъолона иштирок меварзид ва дар маҳв шудани такдирҳои зиёде алоқаи бевосита дорад.
