Дар Ӯзбекистон риши сайёҳро тарошиданд
Дар Ӯзбекистон боз як қатор рейдҳои оммавӣ алайҳи мардоне, ки риш доранд, баргузор гардид, — хабар медиҳад «Радиои Озодӣ«. Дар ҷараёни ин амалиёт мардони ришдорро ба шӯъбаҳои маҳаллии Вазорати корҳои дохилӣ даъват намуда, пас аз гузаронидани «сӯҳбатҳои профилактикӣ« маҷбуран ришашонро тарошиданд. Ба гуфти хабарнигорон, дар байни қурбониёни ин маъракаи нав алайҳи риш ҳатто як сарояндаи машҳур, барандаи медали Олимпӣ ва як сайёҳ низ буданд.
Ёдрас мекунем, ки маърака алайҳи ришдорон дар Ӯзбекистон ҳанӯз дар давраи президенти қаблӣ Ислом Каримов оғоз шуда буд, яъне таъқиби мардон барои доштани риш як падидаи нав нест. Гарчанде ки ба қудрат омадани Шавкат Мирзиёев дар соли 2016 мардум бо умед ба ислоҳот ӯро пешвоз гирифта буданд, амалияи назорат ва фишор ба нишонаҳои динӣ, аз ҷумла доштани риш, ба сатҳи замони ҳукмронии Каримов баргашта истодааст.
Таҳлилгарон бар он ақидаанд, ки ин рафтори кормандони ҳифзи ҳуқуқро наметавон танҳо ба «зиёдравӣ дар ҷойҳо» нисбат дод, зеро маълум аст, ки онҳо чунин дастурро аз Тошканд ва маъмуриятҳои вилоятӣ мегиранд. Масалан, дар соли 2019 як моҷаро пас аз нашри сабти садоӣ бархост, ки дар он Шӯҳрат Ғаниев, ҳокими вилояти Фарғона – дуюмин вилоят аз рӯи шумораи аҳолӣ дар Ӯзбекистон – дар як ҷамъомад бо лаҳни бисёр дағал ба зердастонаш дастур додааст, ки маъракаи зидди риши мардон ва ҳиҷоби занонро оғоз кунанд. «386 нафар – инҳо разилоне ҳастанд, ки риш гузоштаанд. Тадқиқотҳои гузаронидашуда нишон медиҳанд, ки бештар аз ҳама ришҳои нохушояндро сокинони Қӯқанд, Фарғона ва Марғилон, инчунин ноҳияҳои Бувайдо ва Фарғона мегузоранд. Ғайр аз ин, 851 зану духтар, ки сатр ва ҳиҷоб мепӯшанд ва тарзи либоспӯшии миллиро риоя намекунанд, ошкор карда шуданд. Бо онҳо корҳои профилактикӣ гузаронида шуд. Баъдан 300 нафари онҳо намуди зоҳириашонро тағйир доданд. … Ҳокимони мӯҳтарам, шуморо огоҳ мекунам: агар ман дар ҷамъомадҳо занеро бо сатри мусулмонӣ бинам, нигоҳ намекунам, ки ӯ кӣ аст – раиси маҳалла, омӯзгор, соҳибкор, фаъол ё вакили халқ – ин сатрро мегираму ба даҳони шумо меандозам», — гуфт ҳокими вилояти Фарғона дар сабт.
