Изофанависӣ барои ҳисобот дар Осиёи Марказӣ
Мақомоти омори Тоҷикистон шумораи сайёҳони ба кишвар ворид шудагонро дақиқ намуд. Чи тавре ки Азия-Плюс менависад, ҳисоботи дар боло овардашуда аз ҳисоботе, ки аз тарафи Кумитаи оиди рушди сайёҳии назди ҳукумати Тоҷикистон эълон карда шуда даҳҳо баробар кам мебошад.
Тибқи маълумоти мақомоти омори Тоҷикистон дар нимсолаи аввали соли ҷорӣ ба кишвар 604,2 ҳазор нафар шаҳрвандони хориҷӣ ворид шудаанд, аз он 524,8 ҳазор нафар бо мақсади шахсӣ, аз ҷумла кормандони ташкилотҳои байналхалқӣ, собиқ шаҳрвандони Тоҷикистон ва ғайра. Шумораи сайёҳон бошад ҳамагӣ 23,7 ҳазор нафарро ташкил намуд.
Ҷолиби диққат дар он аст, ки раиси Кумитаи оиди рушди сайёҳӣ Нуъмон Абдуғаффорзода дар баромади худ назди намояндагони палатаи поини парлумон дар охири моҳи апрели соли ҷорӣ, дар ҳисоботи овардаи худ рақамҳоро зиёд нишон намуда гуфт: «Дар тӯли се моҳи соли 2019 ба кишвар 215 ҳазор сайёҳон назар ба ҳамин давраи соли 2017 як баробар зиёд ворид шудаанд».
Ин бемории дуру дарози ҳамаи мақомотҳои на танҳо Тоҷикистон, балки тамоми кишварҳои Осиёи Марказӣ мебошад. Масалан, ҳодисаҳои моҳи майи вилояти Андиҷони Ӯзбекистон, пеш аз ташрифи раисҷумҳур Мирзиёев ба минтақа, ҳукумати маҳаллӣ кормандони яке аз фабрикаро ба коттеҷҳои нав маскун намуданд гӯё аз тарафи давлат ба онҳо ҳамчун камбизоатон манзили зист ҷудо шудааст. Вале, пас аз рафтани Мирзиёев аён шуд, ки ин кор барои ҳисобот карда шудаасту тамоми маскун шудагонро аз коттеҷҳои нав берун карданд. Инчунин, дар наздикӣ ба хабарнигорони Хроника Туркменистана дар хусуси изофанависии ҳисоботи ҷамъоварии гандум маълум гардид. Дар охирҳои моҳи июн ВАО расмӣ оиди ҷамъоварии зиёда аз «1 млн 600 ҳазор» тоннаи гандум эълон намуданд, ки тибқи нақшаи давлат чунин миқдор бояд ҷамъоварӣ карда шуд. Вале, манбаҳо ба хабарнигорони мустақил хабар доданд, ки дар асл сарвазир ба дастгоҳи раисҷумҳур оиди ҷамъоварӣ дар хусуси 845 ҳазор тонна ғалла маълумот дод.
