Қотили духтараки тоҷик эҳтимол аст аз ҷавобгарӣ озод шавад
Пас аз 18 рӯзи сипари гаштаи куштори ваҳшиёнаи духтараки 5 солаи тоҷик қотилашро мехоҳанд дар касалии рӯҳӣ эътироф намоянд, дар ин хусус «Азия-Плюс» ба падари духтарак Абдусалом Саидов такя намуда иттилоъ медиҳад.
«Ба ман гуфтанд, ки аз пушти ӯ шахсони баландпоя, аз он ҷумла хоҳараш пуштибонӣ мекунанд. Онҳо мехоҳанд аз болои қотил қарори касали рӯҳӣ бароварда шавад. Аммо, худатон як мулоҳиза намоед, агар ӯ касали рӯҳӣ бошад, пас чӣ тавр ӯ хизмати ҳарбӣ гузаштааст ё ин ки чӣ тавр шаҳодатномаи ронандагӣ гирифтааст? Вақте, ки шаҳодатномаи ронандагӣ мегиред ё ин ки ба хизмати ҳарбӣ шомил мешавед, духтурон шуморо аз муоина мегузаронанд. Санадҳои зеринро ба ӯ ки додааст?», мегӯяд падари Ҳувайдои кушташуда.
Инчунин, Абдусалом Саидов ба беҳаракатии кормандони полис дар замони ғайб задани духтараш шикоят мекунад.
«Ҳар кас дар ғайб задани духтарам аз Александр Сёмин шубҳа намуд, вале кормандони полис, ки ба ҷои ҳодиса расида омадан аз тафтиш намудани манзили истиқоматии Сёмин даст кашиданд. Шояд, ки дар он ҳолат духтарамро наҷот медодам».
Инчунин, Абдусалом аз бародарони динияш сипосгузор мебошад, ки дар замони мусибат кӯмаки худро дареғ надоштанд. Ғайр аз ин, Саидов қайд намуд, ки айнан бо сабаби кӯмаки молии мусулмонон оилаи Саидов тавонист ҷасади Ҳувайдоро ба Тоҷикистон интиқол намояд. Вале, падари Ҳувайдои кушташуда қайд намуд, ки на аз тарафи сафоратхонаи Тоҷикистон дар Русия ва на аз тарафи ҳукумати Русия кӯмаки моддӣ ё ин ки маънавӣ расонида нашудааст.
Ёдрас мекунем, ки тибқи маълумоти ҳукумати Тоҷикистон ҳар сол дар тобутҳои синкӣ ҳазорҳо ҷасади шаҳрвандонамон ба ватан бармегардад, тибқи маълумоти раиси ҳаракати умумирусӣ «Муҳоҷирони меҳнатии тоҷик» Каромат Шарипов ин рақамҳо аз 2 ҳазор зиёдааст, ва такрибан 300 шаҳрванди Тоҷикистон беному нишон ғайб мезананд.
Ҳимоятгарони ҳуқуқ қайд мекунанд, ки шароити беҳуқуқии муҳоҷирони меҳнатӣ аз Осиёи Марказӣ дар Русия ва беэътиноӣ пурраи ҳукумати ин минтақаҳо ба тақдири онҳо сабаби асосист, ки муҳоҷирони меҳнатӣ дар чунин ҳолати аламовар қарор доранд.
