Нақли модари кушташуда дар колонияи шаҳри Ваҳдат
Модари яке аз кушташудагон дар колонияи шаҳри Ваҳдат дар рафти қатли оммавии маҳкумшудагон ба хабарнигорон дар бораи писараш нақл намуд. Сокини маҳаллӣ бо номи Сокина (номаш тағйир дода шудааст) ашки чашмонашро дошта наметавонад. «Писарам ин дунёро дар ҳолати гурусна тарк кард. Аз ман ҳамагӣ як чиз мехост, ягон чизи бомазза ва серғизо биёрам», фиғон дорад модар. Дар ин хусус сомонаи Eurasianet.org менависад.
Писари Сокина пеш аз куштор, пас аз 10 рӯзи сипаришавии моҳи Рамазон аз колония занг зад ва гуфт: «Модарам, илтимос ба ман чизи хӯрданӣ биёр. Мо алҳол рӯзадор ҳастем, аз хӯрок танқисӣ дорем».
Санаи 20-уми май кормандони милисаи маҳаллӣ Сокинаро воқиф намуданд, ки писараш дар рафти исён кушта шудааст ва ӯ метавонад ҷасади писарашро рафта аз колония бигирад.
«Ба чизи шунидаам бовариам намеомад. Охир каме пештар бо ӯ вохӯрда будам. Аз ман дархост намуд, то ба наздаш зуд-зуд хабаргирӣ биёям. Ӯ мегуфт, ба ман чизе лозим нест, танҳо ба вохӯрӣ биё», — нақл мекунад Сокина.
Вақте, ки Сокина ва дигар аъзоёни хонавода ба назди дари зиндон наздик шуданд, онҳоро маҷбур карданд якчанд соат интизор шаванд. Айнан дар ҳамин ҳолат наздикони дигар маҳкумшудагони кушташуда низ қарор доштанд. Дар охир кормандони милиса гуфтанд, ки ҳукумат онҳоро дафн мекунад.
«Бо кормандони милиса муноқиша намудем. Муносибати онҳо бо мо ғайриинсонӣ буд, онҳо моро ҳақир менамуданд. Дар аввал онҳо гуфтанд, ки ҷасадҳоро мебароранд, сипас гуфтанд, ки ҷасадҳоро намебароранд. Ба ман иҷозат надоданд, бо фарзандам алвидо намоям. Ба мо оиди ҳодиса чизе нагуфтанд, чи тавр бетартибӣ шурӯъ гардид, бо чи сабаб, чи тавр писарамро куштанд», — мегӯяд Сокина.
Пас аз муноқишаҳо ва илтиҷоҳои ҳақирона, як гурӯҳ наздиконро ба қабристони шаҳри Душанбе бурданд. Дар он ҷо аз нақлиёти боркашонӣ ҳафт ҷасадро фуроварданд, ки бо матои сафед печонида шуда буд. Сокина мегӯяд, ки кормандони хадамоти амният ба модарон иҷозат надоданд, ки рӯи фарзандони худро бубинанд, ин ҳам боз сабаби хашмгиншавӣ гардид.
«Ман писарамро аз даст додам. Боз оилаҳои дигар шавҳарон, падарон ва писарони худро аз даст додаанд. Онҳо намехостанд, ки мо фарзандони худро бубинем. Ман фарзанд ба воя расонидам, на онҳо. Куштан осон, вале ба воя расонидани фарзанд кори осон нест. Ҳарчанд мо хоҳиш менамудем, кормандони милиса хомӯш меистоданд, ба мо чизе намегуфтанд», — мегӯяд модар.
Ёдрас мекунем, ки аз шаби 19-ум ба 20-уми май дар колонияи низомаш сахти шаҳри Ваҳдат қатли оми маҳкумшудагон рӯй дод, тибқи иттилои гуногун зиёда аз 30 нафар маҳкумшудагон ваҳшиёна кушта шудаанд.
