Раҳмон айбдорони афзоишдиҳандагони нархи интернетро пайдо намуд
Раиси палатаи поёни парлумони Тоҷикистон Шукурҷон Зуҳуров санаи 26-уми апрел фаъолияти Раёсати зиддиинҳисории Тоҷикистонро зери танқиди сахт қарор дод, менависад Азия-Плюс. Ба гуфтаи Зуҳуров, Раёсати зиддиинҳисории Тоҷикистон бо қарори бемулоҳизаи қабул кардаи худ оиди афзоиши нархи интернет аҳолии кишварро ба ташвиш овард.
«Шумо, бо қарори бемулоҳизаи қабул кардаи худ дар давоми як моҳ Тоҷикистонро ба «қаҳрамони асосии» ВАО ҷаҳон кардед, обрӯи пешвои давлатро резондаед», гуфт ӯ.
Ба ақидаи раиси парлумон, вазифадорони раёсатҳо пеш аз афзоиш додани нархи ин ё он хизматрасониҳо, «хусусан сектори иҷтимоӣ» бояд мулоҳиза кард. «Замоне Тоҷикистон ба кишвари рушдёфта ва сарватманд табдил ёбад, аҳолии он бидуни муаммоҳо хоҳад зист, он вақт нархҳоро чанд қадар тавонед афзоиш диҳед. Айни замон ин корро карда наметавонем», иброз намуд раис.
Ёдрас мекунем, ки каме пештар Раёсати зиддиинҳисории Тоҷикистон якҷоя бо Вазорати алоқа қароре қабул намуданд, то нархи трафики интернетро ду баробар афзоиш диҳанд. Вале, аз сабаби он ки қарори мазкур аҳолии кишварро ба хашм овард, Раҳмон дарҳол қарори мазкурро бекор карда, худро сафедкунон иброз намуд, ки гӯё қарори афзоиш намудани нархи интернет аз тарафи якчанд мансабдорони бераҳм қабул шудааст ва роҳбарияти олии кишвар аз он воқиф набуд.
