Раҳмон даъват намуд, ки муборизаро бо фаъолияти беназорати динӣ пурзӯр карда шавад
Раисҷумҳур Раҳмон дар паёми солонаи худ ба парлумони кишвар ба зарурати пурзӯр намудани қонунҳо дар мубориза бо терроризм ва экстремизми динӣ қайд намуд.
Ба гуфтаи Раҳмон, пурзӯршавии мубориза алайҳи ҳаракатҳои гуногуни исломӣ бо ҳодисаҳои моҳи ноябр шуда гузашта вобаста аст. «Чунонки шумо хабар доред, чанде аз аъзои яке аз гурӯҳҳои созмони террористии ба ном давлати исломӣ ба дидбонгоҳи Қӯшунҳои сарҳадӣ ҳуҷум карда, даст ба қатли сарҳадбонон заданд. Бинобар ин, ба мақомотҳои дахлдор зарур аст, ки пеши роҳи таблиғоти экстремизми диниро бигиранд», — гуфт Эмомалӣ Раҳмон.
Инчунин, Раҳмон ба мақомотҳои дахлдор фармуд, ки қонунеро «Дар бораи мубориза алайҳи терроризм» дар шакли нав таҳия ва пешниҳод бикунанд.
«Инсоният дар симои терроризми байналмилалӣ бо душмани бераҳму шафқат ва маккоре рӯ ба рӯ омадааст, ки тамоми меъёрҳои ахлоқӣ ва арзишҳои умумиинсониро поймол карда, барои расидан ба ҳадафҳои худ аз ягон ваҳшоният рӯй намегардонад. Созмонҳои террористӣ бо истифода аз технологияҳои муосири иттилоотӣ ва бо роҳи тафсири ғаразноки сарчашмаҳои динӣ дар мафкураи ҷавонони камтаҷрибаву ноогоҳ ғояҳои тундгароиро ҷой карда, онҳоро ба қатлу куштор, барҳам задани амният ва суботу оромӣ дар мамлакатҳои гуногун ташвиқ менамоянд», қайд намуд Эмомалӣ Раҳмон.
Мушоҳидон қайд мекунанд, ки бо баҳонаи мубориза алайҳи гӯё терроризм дар Тоҷикистон барномаи оиди тозакунии ҳамаи намуди зуҳуроти Исломи ба режим тобеъ набуда амалӣ гардонида мешавад.
Ёдрас мекунем, ки шаби 5-ум ба 6-уми ноябр ба дидбонгоҳи сарҳадии рақами 4 «Ишқобод» ҳамла карда шуд. Иттилои расмии аз тарафи мақомоти қудратӣ дода шуда, дар мушоҳидон ва сокинони кишвар шубҳаҳоро ба миён овард. Зимнан маълумоти расмӣ якчанд маротиба бо маълумотҳои шубҳаовар пур карда мешуд, ки боз ҳам шубҳаҳоро афзоиш медод. Баъзе аз коршиносон иброз намуданд, ки дар қазияи мазкур хадамотҳои махсус даст доранд.
Масалан, коршиноси маъруф оиди Осиёи Миёна Аркадий Дубнов дар шарҳи ба хабарнигори Московский Комсомолец додааш чунин гуфт: «Маълумоте, ки аз ҷониби ҳукумати Тоҷикистон пешниҳод шудааст, ки гӯё ҳамлаи мазкур аз тарафи террористони «Давлати исломӣ» карда шудааст, аз ҳақиқат дур мебошад. Якум, дар тамоми бадиҳо Душанбе «Ҳизби Наҳзати Исломии Тоҷикистон» ва «Давлати исломӣ» — ро айбдор месозад. Дуюм, дар навор мушоҳида кардан мумкин аст, ки дастҳои ҳамлагарон баста аст. Ҳамаи ин ба қаллобӣ далолат мекунад», — гуфт коршинос.
