Раисҷумҳури Туркманистон писарашро ба мансаби раиси вилоят таъин намуд
Раисҷумҳури Туркманистон писари 37 солаи худ Сардор Бердимуҳаммедовро ба мансаби раиси вилояти Ахалск таъин намуд, дар ин хусус ОИ «Хроника Туркменистана» ба оҷонсии иттилоотии давлатии кишвар такя намуда хабар дод.
Пештар Сардор Бердимуҳаммедов ҳамчун муовини ҳоким фаъолият кардааст.
Вилояти Ахалск дар ҷануби кишвар дар қисми маркази Туркманистон ҷойгир шудааст. Масоҳати вилоят — 97 160 км² ташкил медиҳад. Аҳолияш тақрибан 950 ҳазор нафар мебошад.
Ҳиссаи иқтисоди вилоят бо ҳисоби маҷмӯи маҳсулоти минтақавӣ 23% ро ташкил мекунад. Дар соли 2000-ум ба вилояти Ахалск 11% ҷойҳои корӣ, 23% маҳсулоти кишоварзӣ (тибқи нархнома), инчунин 31% аз маҷмӯи истеҳсоли маҳсулоти саноатӣ дар кишвар рост меомад. Минтақаи мазкур оиди ҳаҷми истеҳсоли гази табиӣ дар кишвар дар сафи пеш мебошад (43%).
Ёдрас мекунем, ки айнан чунин ҳолат дар ҳамсоя кишварҳои минтақа низ мушоҳида карда мешавад. Диктаторон фарзандони худро дар мансабҳои асосӣ таъин карда, бо ин онҳо барои худ ворис тайёр мекунанд. Масалан, айнан бо чунин нақша раисҷумҳури Тоҷикистон Эмомалӣ Раҳмон замони дароз аст кӯшиш дорад барои писараш таҳкурсӣ тайёр кунад, то ин ки ҳокимиятро ба ӯ бисупорад. Ҳатто, барои ин Раҳмон ба сарқонуни кишвар тағйирот даровард. Аз корвони дар боло зикршуда Шавкат Мирзиёев ва Нурсултон Назарбоев низ ақиб намемонанд, ки духтаронашон дар кишвар мансабҳои баландпояро ишғол менамоянд.
