Мариупол: ба муҳоҷирони меҳнатӣ маош намедиҳанд
Муҳоҷирони тоҷик, ки дар корҳои бозсозӣ дар Мариуполи аз ҷониби Русия ишғолшуда кор мекарданд, гуфтаанд, ки корфармоёнашон маоши созиш шударо намедиҳанд. Аксари муҳоҷирон аз моҳи октябр-ноябри соли гузашта дар шаҳри харобшуда кор мекунанд. Дар ин бора Озодӣ хабар медиҳад.
Ба гуфтаи яке аз муҳоҷирони тоҷик Сафаралӣ, ҳудуди 300 нафар маоши созиш шударо нагирифтаанд. «Корфармоён ваъда доданд, ки моҳе то 120 ҳазор рубл пардохт мекунанд. Моҳҳои аввал ба мо аз нисфи маблағи созиш шуда камтар музд доданд»,—гуфт ӯ.
Ин ягона ҳолат нест, ки ширкатҳои сохтмонии Русия муҳоҷирони Осиёи Марказиро ба корҳои мухталиф дар қаламрави ишғолшудаи Украина дар замони ҷангӣ ҷалб мекунанд.
Нашрияи қирғизии «Kloop» таҳқиқоти худро нашр кард, ки дар он дар бораи муҳоҷирони Қирғизистонӣ, ки онҳо низ пули ваъдашударо нагирифтаанд, гузориш медиҳад. Нашрия видеоеро дар сомона нашр карда, иддао дорад, ки ин навор дар қаламрави ишғолшудаи Украина наворбардорӣ шудааст. Дар навор дида мешавад, ки чӣ гуна дар саҳрое, ки садои шамол шунида мешавад, мардони бо либоси кабуди корӣ дар болои тахта чӯбҳо нишастаанд. Дар гирду атроф – тӯдаҳои замини нав кандашуда мебошад. Шахсе, ки наворбардорӣ мекунад бо забони қирғизӣ дигаронро бо хушҳолӣ ба “гузориш додан” даъват мекунад. «Кори хуб», — мегӯянд ҳамкорони ӯ. Аммо яке аз муҳоҷирон хандида, охиста такрор мекунад: «Наёед, наёед». Дар ҷавоб, гапҳо шунида мешаванд: «Биёед, кор кунед, ин ҷавон аллакай ду рӯз аст кор мекунад», «Ин ҷавон ба наздикӣ хеле сахт афтид».
Ҳамин тариқ, Русия муҳоҷирони меҳнатиро дар хатти ҷабҳа на танҳо дар амалиёти ҷангӣ иҷборӣ истифода мебарад, балки онҳоро ба кор барои барқарор кардани шаҳрҳои харобшудаи Украина, ки зери назорати онҳо қарор дорад, ҷалб карда истодааст.
