Қирғизистон: президенти навбатӣ ваъда дод, ки коррупсияро барҳам медиҳад
Иҷрокунандаи вазифаи Президенти Қирғизистон Садир Жапаров рӯзи 21-уми октябр эълом дошт, ки авфи иқтисодӣ эълон мекунад ва ба фасодкорон 30 рӯз мӯҳлат медиҳад, ки тамоми маблағҳои ғорат кардаашонро ба давлат баргардонанд. «Ман ба шумо 30 рӯз мӯҳлат медиҳам! Ман мехоҳам, ки ҳама чизро худи шумо фош кунед ва дар бораи далелҳои мавҷуда маълумоти воқеӣ пешниҳод кунед. Ҳар он чизе, ки шумо ба даст овардаед, талаб мекунам, ки ба хазинаи давлат баргардонед! Ҳар як тине, ки ғайриқонунӣ аз давлат гирифтаед, ихтиёран баргардонед. Дар бораи амволи худ ва сармояи пинҳонкардаатон маълумот диҳед ва пешниҳод кунед», — гуфта мешавад дар изҳорот.
Ёдрас мекунем, ки Садир Жапаров фаъолияти сиёсии худро соли 2005 оғоз кардааст. Дар моҳи марти соли 2005, ӯ вакили Маҷлиси Қирғизистон даъвати III интихоб шуд ва ҷонибдори Президент Боқиев буд, ки соли 2010 барканор карда шуд. Дар задухӯрдҳои байниқавмӣ дар шаҳри Ӯш ва Ҷалолобод, ки каме пас аз сарнагун кардани Боқиев ба вуқӯъ пайваст, Жапаров ва шарикони ӯ аз рӯи изҳороти худ фаъолона ширкат варзиданд — онҳо кӯшиш карданд, ки задухӯрдҳоро пешгирӣ кунанд, ба гуфтаи мухолифон — онҳо миллатгароёни қирғизро дастгирӣ карданд.
Дар интихоботҳои моҳи октябри соли 2010, ӯ дубора аз рӯйхати ҳизби Ота-Ҷурт вакили маҷлиси Жогорку Кенеш интихоб гардид. Тирамоҳи соли 2012, пас аз кӯшиши забти Кохи Сафед аз ҷониби тазоҳургарон, ӯро бо ҳамроҳи Камчыбек Ташиев бо моддаи 295 Кодекси ҷиноятии Ҷумҳурии Қирғизистон «Ғасби иҷбории ҳокимият ё нигоҳ доштани иҷбории ҳокимият» айбдор карданд.
Моҳи марти соли 2013 Додгоҳи ноҳияи Первомайскии шаҳри Бишкек онҳоро айбдор донист ва ба як солу шаш моҳи зиндон маҳкум кард. Аммо моҳи июни соли 2013 Додгоҳи шаҳри Бишкек онҳоро сафед карда дар толори додгоҳ озод кард. Соли 2013, ҳангоми тазоҳурот алайҳи Кумтор дар Каракол (маркази вилояти Иссиқкӯл), эътирозгарон хостанд, губернатори вилоят Эмилбек Каптагаевро ба гарав гиранд. Дар кори мазкур ҳукумат Садир Жапаров ва Кубанычбек Қодировро ҳамчун ташкилкунанда айбдор намуд. Пешвоёни эътироз боздошт шуданд, аммо Садир Жапаров, ки даст доштани худро рад мекард, кишварро тарк кард. Соли 2017, ҳангоми кӯшиши бозгашт ба Қирғизистон, ӯ дар марзи Қирғизистон ва Қазоқистон боздошт шуд. Оиди парвандаи ба гаравгон гирифтани Эмилбек Каптагаев ӯ ба 11 солу 6 моҳи зиндон маҳкум шуд. Дар ҷараёни мавҷи эътирозҳо, ки 6-уми октябри соли равон оғоз ёфт ва сабаби он норозигӣ аз натиҷаҳои интихоботи парлумонӣ буд, ҳамроҳ бо президенти собиқ Атамбоев ва чанд сиёсатмадори дигар аз боздоштгоҳи муваққатӣ озод карда шуданд.
Таҳририяити «Хабарҳо» ба рӯзноманигори қирғиз Перизат Қирғизбоева муроҷиат кард, то дар бораи он чӣ ки имрӯз дар Қирғизистон рух медиҳад, шарҳ диҳад:
«Садир Жапаров ва дастаи ӯ ҳоло бо ҳар роҳ кӯшиш мекунанд, ки умед ва эътимодеро, ки кланҳои мухталифи назоратшаванда ва нерӯҳои сиёсии Қирғизистон ба ӯ зоҳир кардаанд, сафед кунанд. Инчунин ӯ низ ният дорад, мансабашро супорад ва ба интихоботи президентии моҳи январ иштирок варзад. Вобаста ба ин, дар кишвар кор дар соҳаи мубориза бо коррупсия хеле фаъол гардидааст. Чанде пеш Жапаров барои пур кардани буҷаи ғоратшудаи кишвар ба афроди мансабдор ва тороҷгарон авф эълон кард. Дар ин замина, ҳабси пурсарусадои баъзе шахсиятҳои маъруф сурат гирифт.
Дар мавриди сиёсати хориҷӣ, маҳз дар робита бо Русия, Садир Жапаров ваъда дод, ки роҳи кунунии тарафдори Русияро нигоҳ медорад. Чанде қабл роҳбари Вазорати корҳои хориҷии Қирғизистон Руслан Казакбаев таъкид кард, ки муносибатҳои стратегӣ ба ягон вазъи сиёсии Қирғизистон ё аз баргузоршавии чорабиниҳои сиёсӣ дар Қирғизистон ва ё Русия набояд вобаста бошанд. Ва нахустин сафари хориҷии иҷрокунандаи вазифаи президент ва Сарвазири Ҷумҳурии Қирғизистон Садир Жапаров ба Москва хоҳад шуд, бинобар ин ҳеҷ асосе барои гуфтани вазъ дар кишвар дар сиёсати хориҷӣ тағир ёфтааст нест».
