Аз пайи модарон шуданд: Раҳмон аз Қодиров ибрат мегирад
Вазорати корҳои дохилии Ҷумҳурии Тоҷикистон дар ниҳоят макони будубоши модари бедаракшудаи блогнависи маъруфи мухолиф Шерзод Маҳмадҷоновро, ки дар Олмон ба сар мебарад ва бо тахаллуси “Абдурахмон 09” баромад мекунад, ошкор кард. Вазорати корҳои дохилии Тоҷикистон тасдиқ кард, ки сокини шаҳри Ваҳдат Шоҳида Маҳмадҷонова дар ҳабс буда, нисбати ӯ бар асоси қисми 2 моддаи 307 Кодекси ҷиноятии Ҷумҳурии Тоҷикистон (Ташкили фаъолияти ташкилоти экстремистӣ) парвандаи ҷиноӣ боз шудааст. Гузашта аз ин, дар мақомот мегӯянд, ки таъқиби ин зан ба далели фаъолияти писараш иртибот дорад. «Ёдрас мекунем, ки писари маҳбус Маҳмадҷонов Шерзод Тулфорович блогер ё мухолиф нест, балки барои содир намудани ҷиноятҳои дорои хусусияти экстремистӣ-террористӣ дар ҷустуҷӯ қарор дорад», — гуфта шудааст дар иттилоияи расмии Раёсат.
Ёдрас мекунем, ки Шоҳида Маҳмадҷонова аз рӯзи 3 феврал ба ШКД-и шаҳри Ваҳдат рафта, то ҳол бедарак буд. Дар тамоми ин муддат дар куҷо будубоши ӯ номаълум боқӣ мемонд ва мақомот аз шарҳи ҳодиса худдорӣ мекарданд.
Қобили зикр аст, ки таъқиби наздикони мухолифон барои Тоҷикистон як падидаи комилан нав аст ва шояд такрори таҷрибаи ахири раисҷумҳури Чеченистон Рамазон Қодиров алайҳи блогнависоне бошад, ки ӯро интиқод мекунанд. Аз моҳи декабри соли гузашта наздикони блогнависони мухолиф — Тумсо Абдураҳмонов, Мансур Саъдулаев ва Ҳасан Халитов якбора дар Чеченистон ғайб заданд. Дар моҳи январи соли ҷорӣ мақомоти амниятии Чеченистон модари ҳомии ҳуқуқ Абубакар Янгулбоевро рабудаанд ва алайҳи ӯ парвандаи ҷиноӣ боз карданд.
