БРО: мақомоти Тоҷикистон бояд аз муҳоҷирони меҳнатӣ дифоъ кунанд
Чи тавре ки Азия Плюс менависад, гузориши Бонки Осиёии Рушд дар бораи пуштибонӣ аз муҳоҷирони меҳнатии тоҷик, ки рӯзи 9-уми декабр нашр шуд, мегӯяд, давлати Тоҷикистон бо танзими хуруҷи муҳоҷирони меҳнатӣ, таъмини амният ва некӯаҳволии онҳо ва ҳифзи шаъну шарафи онҳо дар кишварҳои иқомат бояд машғул шавад. Қайд карда мешавад, ки муҳоҷирати меҳнатӣ манбаи асосии тавозуни иқтисодӣ дар кишвар мебошад.
“Муҳоҷират ба кишварҳои дигар сатҳи бекориро паст карда, ба воридшавии асъор мусоидат мекунад. Интиқоли маблағи муҳоҷирони тоҷик дар соли 2019 2,7 миллиард долларро ташкил дод, ки ин ба 33,4% ММД-и соли гузаштаи кишвар баробар аст», — менависад нашрия.
Дар гузориши мазкур гуфта мешавад, ки аксари кулли муҳоҷирони меҳнатии тоҷик (85%) ҷавонони деҳот мебошанд, ки синнашон аз 15 то 44 сола аст. Тақрибан 98% -и онҳо бо якчанд сабаб ба Русия мераванд, ин забони нисбатан фаҳмо, фарқи назаррас дар музди меҳнат, инчунин низоми бидуни раводид ва ғайра мебошад. Инчунин қайд карда мешавад, ки қисми зиёди мардони муҳоҷир дар соҳаи сохтмон ҳамчун коргарони бидуни ихтисос кор мекунанд, занони муҳоҷир бошанд дар соҳаи хизматрасонӣ кору фаъолият мекунанд.
Дар гузориши мазкур мушкилоти зиёде, ки муҳоҷирон дар сарзамини бегона дучор меоянд, таъкид шудааст. Аз ҷумла гуфта мешавад, ки аксари муҳоҷирон аз сабаби паст будани тахассус ва бесаводии ҳуқуқӣ, инчунин ноумедӣ, омодаанд ҳама гуна шароити кориро қабул бикунанд.
«Ин шароитҳо боиси истисмори меҳнат аз ҷониби корфармоён, сӯиистифода аз тарафи кормандони полис ва тамаъҷӯӣ аз ҷониби ҷинояткорон мегардад», — мегӯянд муаллифони гузориш.
Илова бар ин, дар матни ин таҳқиқот кайфияти бегонаситезӣ дар Русия таъкид шудааст, ки муҳоҷирон пас аз бозгашт ба ватанашон дар бораи он сӯҳбат мекунанд. Гуфта мешавад, ки аксари муҳоҷирон барои сарфаҷӯӣ дар камбизоатии шадид ва шароити вазнин дар манзилҳои серодам зиндагӣ мекунанд, ки ба саломатии онҳо таъсир мерасонад.
Дар гузориши мазкур омадааст, ки муҳоҷират муҳимтарин василаи зиндагии шаҳрвандони Тоҷикистон аст ва барои ҳифзи муҳоҷирони тоҷик дар хориҷа бояд чораҳои дахлдор андешида шаванд.
