Фарёди кӯмак аз маҳбусони муассисаи ислоҳии рақами 4 ш. Душанбе
Дар муассисаи ислоҳии рақами 4 ш. Душанбе оиди вуҷуд доштани ситам ва тамаъҷӯии пул аз маҳбусон тафтишот шурӯъ гардидааст. Дар ин хусус санаи 26-уми марти соли ҷорӣ дар ҳамсӯҳбат бо хабарнигори радиои Озодӣ сардори СРИҶҶ Вазорати адлияи ҶТ иттило дод.
Сабаби шурӯъ гардидани тафтишот дар муассиса, муроҷиати овозӣ оиди фарёди кӯмак ба маҳбусоне, ки дар муассисаи мазкур адои ҷазо менамоянд гардид. Муроҷиати овозӣ якчанд рӯз пеш дар саҳифаи Ислоҳ.нет нашр гардидааст.
Дар муроҷиати худ маҳбусон дар бораи ваҳшатҳои режими Раҳмон дар паси деворҳои муассиса ҳар рӯз бо он рӯбарӯ мегарданд нақл менамоянд. Аз ҷумла дар муроҷиат дар хусуси латукӯбкунии ҳар рӯзинаи маҳбусон бо расонидани ҷароҳатҳои ҷисмонӣ ва бо якчанд оқибатҳои марговар гуфта шудааст. Инчунин, дар хусуси пулгирии кормандони муассиса, шароити нигоҳдории ғайриинсонӣ, хӯрокҳои нохӯрданӣ ва масхара шудани маҳбусон аз тарафи кормандони муассиса нақл шудааст. Ҳамчун мисол далел оварда шудааст, ки баъзе кормандони муассиса, аз ҷумла сардори муассиса Ҷамолиддин Хушвахтзода, ҷойнишинаш Каромат Мирзоназаров, сардори режим Рустам Нуруллоев ва кормандони фаврӣ Бобоҷон Шарипов, лейтенанти калон Абубакр, капитани адлия Беҳруз, капитани адлия Меҳроб мунтазам маҳбусонро таҳқир намуда, байни маҳбусон кинаву адоват, низоъро барангехта ҷанг меандозанд. Муассисае, ки барои 700-800 нафар муайян шудааст, 2500 нафар маҳбус ҷойгир карда шудааст. Барои истифода бурдани ҷиҳозҳои маъишии электрикӣ, то ин ки хӯрок гарм карда шавад, ё ин ки барои ҷӯшонидани об аз ҳар як дастаи маҳбусон ба миқдори 250-350 сомонӣ канда мегиранд.
