Хоруғ: эътирозҳои навбатӣ
Рӯзи 14 май дар шаҳри Хоруғи Вилояти Мухтори Кӯҳистони Бадахшон садҳо нафар сокинон эътироз карда, истеъфои раиси вилоят Алишер Мирзонабот ва раиси шаҳри Хоруғ Ризо Назарзодаро талаб карданд. Ба гузориши хабаргузории centralasia.media, бо истинод ба Бадахшон, онҳо ҳамчунин барканор кардани тамоми посгоҳҳо дар Хоруғ ва қатъи таъқиби сокинони Бадахшонро талаб кардаанд.
Ғайр аз ин, тазоҳургарон исрор доштанд, ки масъулони марги Гулбиддин Зиёбеков (ӯ моҳи ноябри соли 2021 дар ҷараёни ба истилоҳ “амалиёти вижа”-и нерӯҳои қудратӣ кушта шуд), озодии Амриддин Аловатшоев, Чоршанбе Чоршанбиев ва дигар сокинони маҳаллӣ, ки пас аз эътирозҳои моҳи ноябри соли 2021 боздошт шуда буданд ба ҷавобгарии ҷиноӣ кашида шаванд. Эътирозгарон иддаъо карданд, ки агар талаби онҳо иҷро нашавад, дубора барои эътироз гирди ҳам меоянд.
Ба иттилои расонаҳои маҳаллӣ, кормандони интизомӣ дар ВМКБ шоми 16 май ба сӯи эътирозгарон дар Хоруғ бо тирҳои резинӣ ва гази ашковар ҳамла карданд. Ба гуфтаи рӯзноманигорони маҳаллӣ, дар миёни тазоҳуркунандагон талафот — кушта ва захмӣ ҳастанд, теъдоди дақиқи қурбониён гуфта нашудааст.
Вазорати корҳои дохилии Тоҷикистон рӯзи 18 май аз оғози амалиёти зиддитеррористӣ дар ВМКБ хабар дод. Сокинони маҳаллӣ дар навбати худ ба муқобили қонуншикании мақомот идома дода, аз мақомоти маҳаллӣ талаб доранд, ки аз худсарӣ дар минтақа ҷилавгирӣ кунанд.
Мақомоти Тоҷикистон мегӯянд, ки иддае аз террористҳои хориҷӣ дар ташкили норозигии мардум даст доранд. «Онҳо бо дастгирии созмонҳои террористии байналмилалӣ дар хориҷ аз кишвар силоҳу муҳимоти ҷангӣ дарёфт намуда, ҳамчунин «зархаридони хориҷиро барои анҷом додани амалҳои террористӣ ва дигар шаклҳои иғвоангез ҷалб намудаанд», — омадааст дар иттилоияи ВКД.
Қобили зикр аст, ки дар ҷараёни тазоҳуроти мардумии моҳи январ дар Қазоқистон низ режими Токаев иддао карда буд, ки дар ташкили гирдиҳамоӣ террористони хориҷӣ даст доранд.
