Путин Бердимуҳаммадови хурдро сарфароз гардонид
Раисиҷумҳури Русия Владимир Путин дар пасманзари наздик шудани шикасти Русия дар Украина ба кишварҳои Осиёи Марказӣ таваҷҷӯҳи бештар зоҳир мекунад. Масалан, Путин президенти навбунёди Туркманистон Сердар Бердимуҳаммадовро бо ордени Дӯстӣ сарфароз гардонид. Қарори дахлдор дар портали расмии иттилооти ҳуқуқӣ нашр шудааст.
Дар матни санад гуфта мешавад, ки Бердимуҳаммадов гӯё барои “саҳми бузург дар таҳкими шарикии стратегӣ байни Федератсияи Русия ва Туркманистон” сарфароз гардонида шудааст.
Сердар Бердимуҳаммадов, писари раисиҷумҳури пешини Туркманистон, ки 15 сол дар ин кишвар ҳукмронӣ кардааст, дар натиҷаи интихоботи пеш аз мӯҳлат дар рӯзи 12 март, бар асоси маълумоти расмӣ 72,97 дарсади овозро ба даст оварда, ба сари қудрат омад.
Дар ҳамин ҳол гуфта нашудааст, ки Бердимуҳаммадови хурд дар тӯли камтар аз 2 моҳ чӣ гуна саҳм гузаронида тавонистааст.
Ёдрас мекунем, ки вақтҳои охир ин аввалин маротибае нест, ки Русия ба диктаторҳои Осиёи Марказӣ тавваҷӯҳ зоҳир мекунад. Рӯзи гузашта дар мулоқот бо Раҳмон дар Москва ғайриинтизор Путин аз андешаи раисиҷумҳури Тоҷикистон нигарон шуд. «Ман хеле шавқмандам, ки андешаи шуморо дар бораи он, ки дар ояндаи наздик барои таҳкими амнияти мо дар ин минтақа чӣ кор кардан лозим аст», — гуфт Путин.
