Давраи дуюм: Раҳмон дар шаҳри Бохтар як корхонаро «ботантана ифтитоҳ намуд»
24-уми марти соли ҷорӣ Эмомалӣ Раҳмон зимни сафари корӣ ба вилояти Хатлон, фаъолияти корхонаи истеҳсоли дучарха ва ҷуробҳои ҶДММ «Сомони Расул» дар шаҳри Бохтар бударо оғоз намуд. Тибқи иттилои хадамоти матбуоти сарвари давлат, корхона аз ҷониби соҳибкори ватанӣ Расул Соҳибназаров таъсис дода шудааст, ки 40 нафар мутахассисони маҳаллиро бо ҷойҳои корӣ таъмин мекунад ва иқтидори корхона дар як сол 10 ҳазор дучарха истеҳсол кардан дар назар дошта шудааст.
Ҷолиби диққат аст, ки як сол қабл ифтитоҳи бошукӯҳи корхонаи мазкур бо иштироки Сарвазири Тоҷикистон Коҳир Расулзода ва раиси вилояти Хатлон Қурбон Ҳакимзода, инчунин бо фарогирии васеи ВАО-и Тоҷикистон аллакай баргузор шуда буд. Сипас, дар паёми ҳукумати вилоят қайд карда шуд, ки 56 сокини маҳаллӣ бо кор таъмин карда шуданд, ки бо нерӯи онҳо корхона дар як шабонарӯз 10 дучарха ва 200 ҷуфт ҷуроб истеҳсол мекунад.
Бояд қайд кард, ки Президент Эмомалӣ Раҳмон дар ифтитоҳи иншоотҳои гуногун, хоҳ объектҳои тиҷоратии хусусӣ ва хоҳ объектҳои давлатӣ иштирок меварзад, аз ҷумла ҳангоми сафарҳои кории худ ба минтақаҳои кишвар. Барои ҳамин Раҳмон дар байни одамон лақаби «открывашка» — ро гирифтааст.
Ёдрас мекунем, ки моҳи октябри соли гузашта расонаҳои Тоҷикистон маросими ифтитоҳи Маркази савдо ва хидматрасонии «Давлати Зафар» — ро инъикос карданд, ки гӯё дар ошёнаи дуввуми он як сехи дӯзандагӣ бо 100 ҷои корӣ муҷаҳҳаз шудааст. Пас аз он, рӯзноманигорон аз ин иншоот дидан карданд ва як толори холиро пайдо карданд: занҳое, ки дар маросими ифтитоҳ иштирок карда буданд, ба шарти ифшо нашудани номашон ба хабарнигорон гуфтанд, ки масъулини маҳаллӣ онҳоро барои бозидани нақши дӯзандагон дар паси мошинаҳои дӯзандагӣ гузошта буданд.
