Хуҷанд: «сандуқчаи сеҳрнок» барои камбизоатон
Як ҷуфти оиладори нафақахӯрон дар маркази Хуҷанд сандуқе насб карданд, ки дар он ҳар рӯз барои ҳама ниёзмандон нони ройгон гузошта мешавад, менависад Радиои Озодӣ.
Раҳматулло Ғиёсов ва ҳамсараш Бисоҷида мегӯянд, онҳо фарзандонеро тарбия кардаанд, ки хона ва оилаи худро доранд ва акнун метавонанд нафақаи худро бо ниёзмандон тақсим кунанд.
Раҳматуллои 70-сола ва Бисоҷидаи 67-сола, мегӯянд, ки то зинда буданашон ҳар рӯз сандуқро бо нон пур мекунанд ва сокинони дигарро низ даъват мекунанд, ки ба ташаббуси онҳо ҳамроҳ шуда, ба қадри имкон ин «сандуқчаи сеҳрнокро» пур намоянд. Барои ҷалб намудани дигарон ба ин кори хайр, онҳо дар қуттӣ навиштаанд: «Ҳар касе, ки аз ин қуттӣ чизе мегирад, қаноатманд хоҳад буд ва ҳар касе ки дар ин ҷо чизе мегузорад, умри дароз хоҳад дид.» Сандуқ дар назди Қасри ҷавонони шаҳри Хуҷанд, дар наздикии дӯконҳои фурӯши нон гузошта шудааст.
«Нафақахӯрон аз мо хоҳиш карданд, ки ҳар рӯз даҳ дона нони калонро дар қуттӣ гузорем. Барои ин онҳо пешакӣ пул медиҳанд. Ва баъзеҳо аллакай дар бораи ин қуттӣ маълумот доранд ва нонҳоро аз он мегиранд. Инчунин, мо онҳоеро, ки аз ин амал хабар надоранд, ба он ҷо бурда, ба онҳо як ё ду нони ройгон медиҳем»,- гуфт нонфурӯш.
Тибқи омори расмӣ, дар Тоҷикистон 182 ҳазор оилаи камбизоат зиндагӣ мекунанд. Бо сабаби пандемияи коронавирус ва дар натиҷаи аз даст рафтани садҳо ҷойҳои корӣ, чи дар худи Тоҷикистон ва чӣ дар муҳоҷирати меҳнатӣ дар Русия, шумораи чунин хонаводаҳо хеле афзудааст.
