Иззат Амон: 6 соли дигар махрумият аз озодӣ

Иззат Амон, ҳимоятгари маъруфи ҳуқуқи муҳоҷирони меҳнатӣ дар чаҳорчӯби парвандаи ҷиноии бофташудаи қаллобӣ 6 соли зиндони изофӣ гирифт.  Ҳукми мазкур рӯзи 6 июн дар додгоҳи ноҳияи И.Сомонии шаҳри Душанбе эълон шуд. Қаблан ӯро додгоҳи пойтахт бо ҳамин иттиҳом ба 9 соли зиндон маҳкум карда буд, менависад Азия Плюс. Наздикони ҳомии ҳуқуқ бо иттиҳом розӣ нестанд ва ният доранд ҳукми додгоҳро лағв кунанд.

Маҳмадюсуф Холов, писари Иззат Амон, ба хабарнигорон гуфт, омода аст, дар ҳузури додрас ва додситон ба даъвогарон пардохт кунад. «Аммо онҳо ҳукмро хонда, бе саволу ҷавоб толори додгоҳро тарк карданд», — гуфт Холов.  «Додгоҳ назари моро напурсид ва ҳукмро эълон кард.» Қаблан Додгоҳи олии Тоҷикистон шикояти онҳоро алайҳи ҳукми додгоҳ рад карда буд.

Ёдрас мекунем, ки Иззат Амон собиқ раиси Маркази тоҷикон дар шаҳри Москва борҳо аз режими Раҳмон интиқод карда, онро ба сиёсати зиддиисломӣ, фасод ва бетаваҷҷӯҳӣ нисбат ба шаҳрвандонаш муттаҳам мекард. Соли 2021 ӯ бо дархости мақомоти Тоҷикистон аз шаҳрвандии Русия маҳрум шуд ва пас аз он фавран аз Русия ба Душанбе депортатсия шуд ва баъди расидан ба фурудгоҳи Душанбе аз ҷониби Кумитаи давлатии амнияти миллии Тоҷикистон боздошт шуд.

Баъдан алайҳи ӯ парвандаи нави ҷиноӣ оғоз гардид. Мақомот гуфтанд, ки ду даъвогар 17 ҳазор доллар ҷуброн талаб кардаанд.  Ҳарчанд наздикони Иззат Амон мегӯянд, ки ин муомила солҳои гузашта сурат гирифтааст ва даъвогарон маблағашонро гирифта буданд, ба ҳар ҳол онҳо омодаанд дар ивази раҳоии Иззат Амон маблағро бори дигар пардохт намоянд. Ҳоло мегӯянд, мақомот гӯё маблағи даъвогарон ва озодии Иззат Амонро намехоҳанд, онҳо танҳо мехоҳанд, ки ҳукми ӯро тамдид кунанд.

Сиёсатшиносон ва ҳомиёни ҳуқуқ боздошт ва иттиҳомоти нав алайҳи Иззат Амонро ангезаи сиёсӣ ва марбут ба интиқодҳои ӯ аз режими Раҳмон медонанд.