Комиссари Шоҳмансур зердасташро латукӯб кард
Чанде қабл дар шабакаҳои иҷтимоӣ видео навори ҷанҷолбарангез пайдо шуд, ки дар он комиссари ноҳияи Шоҳмансур бо дағалӣ ба зердасташ муомила карда, ӯ ва волидонашро таҳқир мекунад. Дар видео навор мушоҳида карда мешавад, ки чӣ гуна тобеъ аз сардор хоҳиш мекунад, ки волидонашро таҳқир накунад, дар ҷавоб сардор боз ҳам дарғазаб шуда бо суханҳои қабеҳ ҳақорат мекунад. Инчунин метавонед шунавед, ки комиссар ӯро барои эътирози лафзӣ латукӯб мекунад.
Дар ҳоли ҳозир, ин навор дар Фейсбук ва Инстаграм ба таври густарда паҳн шуда истодааст, истифодабарандагони сомонаҳои иҷтимоӣ хидматчии давлатиро маҳкум мекунанд ва инчунин мақомотро даъват мекунанд, ки ба суиистифода аз ваколат аз ҷониби комиссар вокуниш нишон диҳанд ва ӯро шадидан муҷозот намоянд.
Ҷолиби диққат аст, ки чунин ҳодисаҳо дар Тоҷикистон кам нестанд ва кайҳо боз маъмул шудаанд, вақте ки шахсони мансабдор сӯистифода аз ваколатҳои хизматии худ одамонро таҳқир мекунад ва беҷазо мемонад. Танҳо дар ҳолатҳои нодир, вақте ки чунин ҳодисаҳо дар камераи наворбардори сабт шаванд, онҳо оммавӣ мешаванд. Дар аксарияти чунин ҳодисаҳо ҷинояткорон танҳо бо ҷаримаҳои ночиз халос мешаванд ва баъзан онҳо ба ҳеҷ ваҷҳ ба ҷавобгарӣ кашида намешаванд.
Масалан, дар соли 2017 дар Интернет видео наворе паҳн гардида буд, ки дар он сармутахассиси раёсати умури динии деҳаи Чоряккорони ноҳияи Рӯдакӣ Шокир Холдоров дар саҳни масҷид намозгузоронро ба шакли қабеҳ таҳқир мекунад ва аз онҳо талаб мекунад, ки масҷидро бубанданд. Мансабдор бо суханони қабеҳ дашном карда, овозашро баланд карда мегӯяд, ки қаблан ӯ намоз гузоштанро дар ин масҷиди «ғайрирасмӣ» борҳо манъ карда буд. Сокинони деҳа дар навор мегӯянд, ки онҳо барои суханҳои қабеҳ дар ҷои ҷамъиятӣ аз болои мансабдор шикоят хоҳанд кард. «Бирав, дар куҷое ки хоҳи, шикоят кун! Ман ҳамаи шуморо салафӣ эълон мекунам!», гуфта буд мансабдор. Пас аз он мансабдор барои вайрон кардани моддаи 481 Кодекси ҳуқуқвайронкунии маъмурӣ ба маблағи 500 сомонӣ ҷарима карда шуд, ки пас аз он, гӯё ки ҳеҷ чиз нашудааст, ӯ ба вазифаи хидматиаш баргашт.
Ёдрас мекунем, ки дар қонунгузории Тоҷикистон ҷавобгарии ҷиноятӣ танҳо барои таҳқири хизматчиёни давлатӣ пешбинӣ шудааст, ки ин боиси сӯистифода аз ваколати мансабдорон ва кормандони мақомоти ҳифзи ҳуқуқ мегардад.
