Сокини Тоҷикистон: «Дар ягон ваҷҳ ҳиҷобамро бадар намекунам»
Дар шимоли Тоҷикистон кормандони милиса ба ҷои истиқоматкунии бевазан даромада аз ӯ бадар кардани ҳиҷобро талаб намуданд.
Ба таҳририяти ОИ «Азия-плюс» сокини маҳаллӣ Наргис Қурбонова бо шикоят муроҷиат намудааст: «Ба ҷои зисти ман ду корманди милиса бе огоҳӣ зада даромаданд, ки яке аз онҳо нозири минтақа буд. Замоне нозири минтақа ба ҷои зистам омада аз ман талаб карда буд, ки тибқи қонун ҳиҷобпӯшӣ манъ аст ва ман бояд онро бадар кунам. Дар он вақт ман ба ӯ гуфтам, ки қонуни зерин дар қонунгузорӣ вуҷуд надорад ва ман ҳиҷобро дар ягон ваҷҳ бадар намекунам. Зеро интихоби ман ҳамин аст ва маро Аллоҳ ба ин амр намудааст. Нозири минтақа ба ман чизе нагуфт ва аз ҷои зистам баромада рафт. Акнун бошад бо як корманди милиса ба ҷои зистам зада даромада, бо суханҳои қабеҳ дашном доданд ва маро ҳамроҳи писарам маҷбур карданд, ки ба шӯъбаи милиса равем, вагарна маро ба зиндон равона мекунанд», мегӯяд ӯ.
Зани нотарс худашро гум накарда дарҳол ба телефони боварии ИВКД-и вилояти Суғд ба рақами 6-22-22 занг задааст. «Дар онҷо ба ӯ посух додаанд, ки пӯшидани ҳиҷоб манъ аст. Навбатдор бо муомилаи хуб гуфтааст, ки пӯшидани ҳиҷоб манъ карда шудааст ва ин амр аз боло мебошад», хабар дод зан.
Инчунин Наргис Қурбонова гуфт, ки пештар дар яке аз донишгоҳҳо забони англисӣ меомӯзондаст. «Чор сол пеш ҳангоми ба пӯшидани ҳиҷоб шурӯъ намудам, маҷбур шудам, ки аз кор холӣ шавам. Ҳоло бошад хонанишин ҳастам. Дар ягон ваҷҳ ҳиҷобро бадар намекунам», гуфт ӯ.
Боз илова карда мегӯяд: «аз одамон шунидаам, ки имрӯз дар бозори панҷшанбе занони сатрдорро дастгир намуданд».
«Намедонам, чи тавр зиндагӣ намоям. Ба наздики духтарони ҳамсояам барои сатр карданашон ба фишорҳо дучор шуда, маҷбур шуданд барои зиндагонӣ кардан ба Русия бикӯчанд».
