Фурӯхтан фоиданоктар аст: дар Тоҷикистон нерӯи барқ боз маҳдуд шуд
Дар Тоҷикистон сар аз 1 феврали соли 2023 дар интиқоли нерӯи барқ маҳдудият ҷорӣ шуд, дар ин бора рӯзи 31 январ аз ширкати энержии «Барқи тоҷик» хабар доданд. Лимити энержӣ «бо мақсади пешгирӣ аз камбуди нерӯи барқ ва оқибатҳои манфии он барои соҳаи иҷтимоъиву иқтисодии кишвар» ҷорӣ карда мешавад, гуфта мешавад дар муроҷиатномаи нашршудаи ширкати энержӣ. Ҳамчунин, «Барқи тоҷик» қайд кардааст, ки маҳдудият дар интиқоли нерӯи барқ ба Душанбе ва шаҳрҳои бузурги кишвар таъсире нахоҳад дошт. Ширкати “Барқи тоҷик” мегӯяд, дар пайи афзоиши талабот ба нерӯи барқ дар моҳи январ ҳаҷми масрафи об аз НБО Норак низ афзоиш ёфтааст.
Ёдовар мешавем, ки лимити интиқоли нерӯи барқ ҳанӯз дар моҳи октябри соли гузашта ҷорӣ шуда буд, ки дар сардиҳои моҳи январ ҳатто дар пойтахт ва шаҳрҳои бузург қатъ шуда буд. Эмомалӣ Раҳмон, дар миёни сармоҳои сард ба ширкати «Барқи тоҷик» дастур дод, ки маҳдудиятҳои барқро дар кишвар комилан лағв кунад ва худи ҳамон рӯз ин ширкат эълом кард, ки маҳдудият дар истифодаи нерӯи барқ дар кишвар комилан лағв шудааст.
Бо вуҷуди ин, сокинони навоҳии мухталиф аз мавориди зиёди қатъи нерӯи барқ шикоят карданд, ки ба гуфтаи сокинони вилоятҳои Суғду Хатлон ва навоҳии тобеи марказ, аз 20 январ аз соати 22:00 то 5:00 нерӯи барқ қатъ мешавад.
Мақомот қатъи нерӯи барқро ба корношоямии ХИБ рабт дода, гуфтанд, ки дар рӯзҳои сард ниёз ба нерӯи барқ дар минтақаҳо афзоиш ёфта, ҳодисаҳои нохуш низ афзоиш ёфтааст.
Қобили зикр аст, ки ширкати “Барқи тоҷик” як рӯз пас аз нишасти хабарии вазири энергетика ва захираҳои оби кишвар Далер Ҷумъа аз ҷорӣ шудани лимити барқ хабар дод, ки дар ҷараёни он вазир аз ҳаҷми рекордии тавлиди нерӯи барқ дар соли гузашта гузориш дода ва изҳор дошт, ки он 21 миллиарду 399,5 миллион киловатт-соатро ташкил дод.
“Соли гузашта аввалин бор дар таърихи мамлакат зиёда аз 21,3 миллиард киловатт-соат кувваи электр хосил карда шуд. Ин дар таърихи системаи энергетикии мамлакат баландтарин нишондиҳанда аст. Дар айни ҳол, масрафи шабонарӯзӣ дар фасли зимистон 81 миллион киловатт соатро ташкил дод, ки ин баландтарин нишондод дар 10 соли ахир аст”, — гуфт ӯ.
Зулфиқори Исмоилиён, коршиноси иқтисод дар сӯҳбат бо рӯзноманигорон қайд кардааст, ки Тоҷикистон ба яке аз содиркунандагони асосии нерӯи барқ дар минтақа табдил ёфтааст, аммо мақомот намехоҳанд, ки мардум дар ин бора маълумоти кофӣ дошта бошанд: «Эълон карданд, ки фалон неругоҳ месозем ва ба ҳамин тариқ аҳолӣ ҳам дар фасли зимистон ва ҳам тобистон бо нерӯи барқ таъмин мешавад. Аммо диданд, ки ягона роҳи пулкорӣ фурӯши барқ аст. Ва аз ҳамин сабаб намегуянд, ки мо фалон кадар зиёд фурухтаем. Мардуми деҳот чароғ надоранд».
