Тоҷикистон: Саридораи мубориза бо коронавирус «Идгардак»-ро манъ кард
Саридораи ҷумҳуриявӣ оид ба пурзӯр намудани чорабиниҳои зиддиэпидемиологӣ оид ба пешгирии паҳншавии сирояти нави COVID-19, дар рӯзи Иди Қурбон ҷашнҳои идонаро манъ кард. Чи тавре ки дар гузориши саридораи номбурда қайд шудааст, тасмими мазкур, бинобар гуфтаи саридора «бо мақсади ҳифзи саломатии ҷомеа ва пешгирии пайдоиши мавҷи дуюми коронавируси COVID-19 дар Тоҷикистон» қабул шудааст.
Дар робита ба ин, тибқи қарори Саридораи ҷумҳурӣ оид ба пешгирии паҳншавии коронавирус, дар рӯзи Иди Қурбон ҷамъшавии одамон, хона ба хона гаштугузор кардан ва инчунин ҷашнҳои идона манъ карда шудааст.
Ба Кумитаи оид ба корҳои дин, танзими анъана ва ҷашну маросимҳо супориш дода шуд, ки дар якҷоягӣ бо мақомоти иҷроияи ҳокимияти давлатии вилоятҳо, шаҳру ноҳияҳо ва комиссияҳои доимии маҳаллӣ оид ба риояи ин талабот корҳои фаҳмондадиҳиро дар байни аҳолӣ пурзӯр намоянд.
Ёдрас мекунем, ки қаблан роҳбари Шӯрои Уламои Маркази Исломии Тоҷикистон зимни нишасти матбуотӣ эълом карда буд, ки имсол Иди Қурбон бидуни намози дастаҷамъӣ баргузор хоҳад шуд.
Дар айни ҳол, сокинони пойтахт хабар медиҳанд, ки дарсҳо дар муассисаҳои таҳсилоти умумӣ аз 17-уми августи соли ҷорӣ сар мешаванд, роҳбарони мактаб дар ин бора, донишҷӯён ва волидайни онҳоро ҳушдор додаанд.»Чаро таҷлили намози дастаҷамъонаи иди Қурбон хатари эпидемиологиро ба бор меорад, аммо ҳузури кӯдакон дар мактаб ин тавр нест», — аз меъёрҳои ду тарафаи ҳукумат дар андешидани чораҳои карантинӣ сокинони шаҳр дар ҳайратанд.
