Туркманистон: Иди Қурбонро «бо сабаби хок дар ҳаво бояд дар хона ҷашн гирифт

Дар Туркманистон ба шаҳрвандон маслиҳат дода шудааст, ки бо сабаби ифлос шудани ҳаво аз хок Иди Қурбон дар хона таҷлил карда шавад. Хабари мазкур 27-уми июли соли ҷорӣ тавассути Оҷонсии иттилоотии давлатӣ ТДҲ паҳн шуд. «Дар ин рӯзҳо бо зиёд шудани миқдори зарраҳои зарарноки хок дар ҳаво, мо ба мардуми кишвар тавсия медиҳем, ки ниқоби тиббӣ дошта бошанд ва 2 метр масофаи иҷтимоиро риоя намоянд. Инчунин, бо маҳдуд кардани чорабиниҳои оммавӣ дар ҷашни Иди Қурбон, онро дар хона ҷашн бигиранд”, — иттилои TДҲ-ро иқтибос карда меорад «Хроника Туркменистана».

Ёдрас мекунем, ки мақомоти Туркманистон то ҳол мавҷудияти ҳолатҳои сирояти коронавирусро дар кишвар рад карда меоянд, ки аллакай ин ба мавзӯи шӯхӣ ва масхара кардани дурӯғҳои режими Бердимуҳамедов гардидааст. Дар кишвар ҷойҳои ҷамъшавии оммавии одамон баста шуда, режими ҳатмии ниқоб ҷорӣ карда шудааст, аммо мақомот ин амалҳоро бо мубориза бар зидди зарраҳои зарарноки хокӣ шарҳ медиҳанд, ки ба гуфтаи онҳо, он метавонад ба саломатии сокинони кишвар зарари ҷиддӣ бирасонад.