Дар фурудгоҳи Тошканд муҳоҷири меҳнатӣ барои видео навор дар телефонаш боздошт шуд
Дар фурудгоҳи Тошканд муҳоҷире, ки аз Русия баргашт, боздошт шуд. Дар телефони ӯ маводи исломӣ ёфт гардид, менависад Podrobno.uz бо истинод ба маълумоти Вазорати корҳои дохилӣ. Мақомоти амниятӣ гуфтанд, ки боздоштшуда зодаи ноҳияи Хуҷелии Қароқалпоқистон, соли таваллудаш 2000 мебошад. Боздоштшуда бо хатсайри Санкт-Петербург-Тошканд ба ватан баргаштааст. Дар хотираи телефонҳои Xiaomi ва Samsung-и ӯ маводи марбут ба фаъолияти ҳаракатҳои исломӣ ёфт шудааст.
Аз рӯи далели мазкур нисбати ҷавон бар асоси қисми 1 моддаи 244-1 (истеҳсол, нигоҳдорӣ, тақсим ё намоиши маводҳое, ки таҳдид ба амнияти ҷамъиятӣ ва тартиботи ҷамъиятӣ дорад) — и Кодекси ҷиноятии Ӯзбекистон парвандаи ҷиноӣ оғоз карда шуд.
Ёдрас мекунем, ки моҳи январи соли 2020 Радиои Озодлик рӯйхати нави адабиёти мамнӯи исломӣ, сомонаҳо ва ҷараёнҳои исломиро дар кишвар нашр кард. Тибқи санади нашршуда, Кумитаи умури дини назди Ҳукумати Ӯзбекистон рӯйхати таҷдидшудаи маводҳои мамнӯи исломиро аз 25 декабри соли 2019 тасдиқ кард, ки истеҳсол, паҳн ва воридоти онҳорл ба кишвар манъ мекунад.
Ҳомиёни ҳуқуқ қайд мекунанд, ки таҷрибаи тафтиши телефонҳои шаҳрвандон барои мавҷудияти маводи исломӣ аз ҷониби хадамоти махсус ҳатто дар замони Ислом Каримов ҷорӣ шуда буд. Пас аз ба қудрат омадани Шавкат Мирзиёев, аксарият тағироти мусбат дар сиёсати режимро интизор буданд, аммо таҷрибаи таъқиби шаҳрвандон барои фаъолияти динӣ то ҳол идома дорад.
