Дар Ӯзбекистон блогерҳо дастгир карда шуданд
Тайи ҳафтаи охири моҳи августи соли ҷорӣ дар як қатор шаҳрҳои Ӯзбекистон блогерҳо дастгир карда шудаанд.
Тибқи иттилои ҳукумати Ӯзбекистон, блогерҳои ӯзбек Адҳам Олимов (мусанниф Адҳам) ва Зиёдулло Кабиров (Зиёвуддин Раҳим) барои «итоат накардан ба талаботи қонунии кормандони милиса ва муқовимат нишон додан» айбдор дониста шудаанд.
Ба Адҳам Олимов ҷазои маъмурӣ ба мӯҳлати 15 шабонарӯз, ба Зиёдулло Кабиров бошад 10 шабонарӯз ҷазои маъмурӣ ва ба миқдори як маоши ҳадди ақал, яъне 184,300 сӯм ҷарима таъйин гардид. Ғайр аз ин, боз ду блогер ба 15 шабонарӯзи ҷазои маъмурӣ ҳукм карда шудаанд, онҳо Отабек Усмонов аз шаҳри Андиҷон ва Хуршедбек Муҳаммадрозиқов аз шаҳри Қӯқанд мебошанд. Тақдири боз як блогери дигар аз Тошканд то ҳол номаълум боқӣ мемонад.
Дар навбати худ, наздикони дастгиршудагон ба хабарнигорон изҳор намуданд, ки онҳо аз ҷониби кормандони ҳифзи ҳуқуқ якчанд маротиба огоҳ намуда шуданд ва таҳдид карда шуданд.
Ба гуфтаи наздикони Адҳам Олимов, санаи 28-уми август ба манзилгоҳи ӯ, ки воқеъ дар кӯчаи Сагбани ноҳияи Алмазори шаҳри Тошканд ҷойгир аст 8 нафар кормандони шӯъбаи корҳои дохилӣ омада номбурдаро ба шӯъба бурданд. Инчунин, наздикони Олимов хабар доданд, ки номбурда дар вақти дастгиршави муқовимат нишон надодааст.
Ғайр аз ин, бародари айнии Адҳам Олимов Шоҳрух ба хабарнигорон изҳор намуд, ки ҳарчанд аз рӯзи дастгиршавии бародараш 3 рӯз сипарӣ гаштааст, вале то ҳол дар бораи ҷойи дошташудаи ӯ маълумоте пайдо нагардидааст. «Дар бораи сабаби боздоштшавии бародарам маълумоте надорем. Мо ҳатто тахмин ҳам карда наметавонем», мегӯяд ӯ.
Ёдрас мекунем, ки бо омадани Мирзиёев ба сари қудрат ва пас аз шурӯъ гаштани баъзе ислоҳотҳо нисбати Ислом дар сиёсати дохилӣ дар майдонҳои интернет блогерҳо пайдо шуданд. Блогерҳои мазкур умед доштанд, ки ҳукумати кунунӣ дар ҳақиқат ният дорад, то ислоҳотҳои ташаббус кардаашро амалӣ гардонад. Бинобар ин, блогерҳо муаммоҳое, ки дар ҷомеа арзи вуҷуд дошт, аз ҷумла бо ҳиҷоб ба мактаб рафтани духтарон, манъи гуфтани азон аз баландгӯяк ва ғайра афрӯхтанро шурӯъ намуданд ва билохира иқдоми фаъолон сабаби дастгиршавии онҳо гардид.
