Ӯзбекистон: “фабрикаи троллҳо”- и қашқадарё
Ба як донишҷӯи Донишгоҳи давлатии Қашқадарё, ки ташаббуси эҷоди троллҳои онлайн барои муқобила бо интиқоди ҳукумат баромад карда буд, дар як ниҳоди давлатӣ ба кор пешниҳод шудааст. Дар ин бора Радиои Озодлик хабар медиҳад.
Ин донишҷӯ, ки номаш ифшо нашудааст, ин пешниҳодро рӯзи 13 декабр зимни мулоқоти донишҷӯёни Донишгоҳи давлатии Қашқадарё бо раиси вилояти Қашқадарё Муротҷон Азимов баён кардааст. Вай ба Агентии давлатии иттилоот ва коммнуникатсияи оммавӣ пешниҳод кард барои муқобила бо интиқод ва “намоиши тағйироти мусбӣ” дар вилояти Қашқадарё гурӯҳҳои донишҷӯёни онлайн таъсис диҳад. Бисёре аз расонаҳои узбакӣ ва минтақавӣ гуфтаанд, ки ин ташаббус баробар ба таъсиси “фабрикаи троллҳо” аст, ки дар намунаи русии “фабрикаи троллҳо”-и машҳури Евгений Пригожин дар Санкт-Петербург аст.
Қобили зикр аст, ки дар Узбакистон танҳо дар як моҳи ахир чанд блогер барои интиқод аз мақомот ва ё рӯшанӣ андохтани мушкилоти бӯҳрони энержӣ дар кишвар, мушкили барқу газ дар аксари минтақаҳо ба ҷавобгарии маъмурӣ ва ҷиноӣ кашида шуданд. Ҳамин тавр, рӯзи 18 декабр блогнависи 60-сола ва мудири шабакаи телеграмӣ “Патанатомия страны УЗ” Шоҳида Саломова дар Тошканд нопадид шуд. Баъдан маълум шуд, ки вай бо иттиҳоми тӯҳмат ва таҳқир боздошт шудааст, вақтҳои ахир вай аз хонаводаи президент интиқод карда, онҳоро ба фасод муттаҳам мекард. Ҳамчунин, як блогнависи дигар аз Фарғона Олимҷон Ҳайдаров рӯзи 13 декабр бо ҳукми додгоҳ барои рӯшанӣ андохтани мушкили қатъи барқ ва газ ба маблағи 21 миллион сӯм ҷарима баста шуд. Рӯзноманигори дигар Абдулқодир Мӯъминов, ки бо интиқодҳояш аз раисиҷумҳур ва баромадҳояш дар бораи фасод дар Ютуб маъруф буд, гуфтааст, ки ба ӯ кӯшиши суиқасд шудааст.
