Ӯзбекистон: Хадамоти Амнияти давлатӣ ба рӯзноманигорон таҳдид мекунад
Хадамоти амнияти давлатии Ӯзбекистон ба рӯзноманигорон таҳдид ва фишор меорад, ки аз баъзе мавзӯъҳо канорагирӣ кунанд ва баъзе матолибро ҳазф кунанд. Дар ин бора дар як пажӯҳиш, ки рӯзи 3 июн нашрияи The Diplomat нашр шудааст, гуфта мешавад.
Нашрия бахши аввали «таҳқиқи саркӯби афзояндаи Хадамоти амнияти давлатӣ алайҳи хабарнигорон дар Ӯзбекистон»-ро нашр кардааст.
Толиб Раҳматов хабарнигори муфаттиш дар расонаҳои машҳури Kun.uz дар Тошканд буд, ки соли 2019 ба нахустин мулоқоташ бо Хадамоти амнияти давлатӣ (ХАД) дар қаҳвахонаи “Шум бола” даъват шуда буд. Рахматов тарабхонаро барои гузарондани чунин вохурӣ маъқул надонист. «Шум бола» дар забони ӯзбекӣ маънои «бачаи саркаш»-ро дорад, кайд мекунад рӯзнома.
«Онҳо гуфтанд, ки мехоҳанд бо ман наздиктар шинос шаванд», — ба ёд меорад рӯзноманигор. Ба гуфтаи вай, ҳангоми фаолият дар сомонаи Kun.uz Хадамоти амнияти давлатӣ бо ӯ панҷ маротиба тамос гирифтаанд. Ҳар дафъа ӯ ҳис мекард, ки кормандони амният кӯшиш мекунанд ӯро битарсонанд, то ин ки фаолияташро тарк кунад.
«Онҳо билвосита таҳдид мекунанд», — афзуд ӯ. «Мегӯянд, ки оё мехоҳед, ки писар ё духтаратон рӯзе маъюб шавад. Мехоҳед, ки онҳо рӯзе аз кӯча бигузаранд ва бо онҳо чизе рӯй диҳад».
Таҷрибаи Раҳматов бо ХАД ба таҷрибаи беш аз 35 рӯзноманигор, блогер, ҳомиёни ҳуқуқи башар ва нозирони ВАО шабеҳ буд, ки ман аз моҳи март то июни соли ҷорӣ дар Ӯзбекистон мусоҳиба доштам, менависад муаллиф Шерил Л. Рид, нависандаи амрикоӣ ва рӯзноманигор, пажӯҳишгари озодиҳо дар кишварҳои пасошӯравӣ.
Ёдрас мекунем, ки тайи 26 соли режими худкомаи раисиҷумҳури собиқ Ислом Каримов дар зиндонҳо рӯзноманигорон мавриди шиканҷа қарор гирифтанд. Дар поёни соли 2016 президент Шавкат Мирзиёев ба сари қудрат омад, ки дар навбати худ талош кард, дар муносибатҳои рӯзноманигорон ва блогерҳо ҳисси дахлнопазирӣ эҷод кунад.
Дар натиҷа Мирзиёев бо дасти раиси Шӯрои парасторони Фонди ҷамъиятии дастгирӣ ва рушди ВАО-и миллӣ Комил Алламҷонов ва духтараш Саида Мирзиёева як корпоратсияи томи рӯзноманигорони ҷонибдори ҳукуматро таъсис дод. Ҳамаи онхоеро, ки бо сиёсати режим розй набуданд, душмани халк эълон карда, бо бофташавии парвандаҳои чиноӣ зери фишор меоварданд.
