Мақомоти Тоҷикистон вазифаҳои худро ба зиммаи соҳибкорон вомегузорад
Оҷонсии иттилоотӣ Авесто ба хадамоти соҳавӣ такя карда иттилоо додааст, ки зиёда аз 100 нақшаҳои оид ба сохтмони беморхонаҳо ва табобатгоҳҳо дар Тоҷикистон бо маблағҳои соҳибкорон амалӣ мегардад.
Айни замон бо саҳми соҳибкорон 105 беморхона ва табобатгоҳ, 257 маркази тандурустӣ ва 467 нуқтаҳои тиббӣ сохта ва таъмир шуда истодааст. Вале соли гузашта аз ҳисоби тамоми манбаъҳои маблағгузорӣ 4 беморхона бо 264 ҷои хоб ва 74 нуқтаи тиббӣ барои 994 мизоҷон дар як навбат сохта шуда барои истифодабарӣ супорида шудааст. Як қисми объектҳои зикршудаи соҳаи тандурустӣ аз ҳисоби маблағҳои соҳибкорон сохта шудааст.
Мушоҳидон қайд кардаанд, ки тамоюли мазкур сол аз сол афзоиш меёбад ва ин ба мисли боҷи соҳибкорӣ ба ҳукумати кунунӣ пардохт карда мешавад, вагарна, тамоми роҳҳои идома додани фаъолияти соҳибкорӣ барои онҳо қатъ карда мешавад.
Масалан, раисҷумҳур Раҳмон дар паёми худ ба парлумон билвосита ишора карда гуфт: «Солҳои охир дар кишвар беш аз 5 ҳазор масҷид бо усули ҳашар сохта шуд. Барои кӣ? Барои насли калонсол, касе аз давлат кӯмак напурсид, онро худашон сохтаанд. Ҳоло вақти он расидааст, ки дар бораи насли наврас андеша кунем, мактабҳо, марказҳои тиббӣ созем ва ҳама бояд ба ин пайваст шаванд».
Ёдрас мекунем, ки тӯли чандин солҳоест, ки мактабҳо, беморхонаҳо ва роҳҳо на аз тарафи давлат, балки аз тарафи соҳибкорони маҳаллӣ сохта мешавад.
Таҳлилгарон қайд мекунанд, ки бо назардошти сарфи миқдори зиёди маблағ барои дастгоҳи Раҳмон, ки танҳо барои ҳар як боздиди ӯ ба як минтақаи муайяни кишвар сарф мешавад, вазъият хеле бемаъни ба назар мерасад.
