Духтарони Мирзиёев аз Гулнора Каримова пайравӣ мекунанд
Санаи 1-уми октябр дар қасри Humo Arena — и шаҳри Тошканд консерти сарояндаи рус Полина Гагарина баргузор гардид. Дар миёни истифодабарандагони сомонаҳои иҷтимоӣ на худи консерт, балки зиёфати ташкилшуда пас аз консерт баҳси гармро ба вуҷуд овард. Айнан рафтори тардомани духтарон ва домодҳои президент Шавкат Мирзиёев шудааст, ки дар мансабҳои баландпоя дар кишвар мебошанд. Дар навори видеоӣ дар интернет паҳн гардида намоён аст, ки духтарон ва домодҳои раисҷумҳур Шавкат Мирзиёев якҷоя таронаи «Обезоружена» ро месароиданд.
Ёдрас мекунем, ки рафтори тардомани наздикони раисҷумҳур Мирзиёев, хусусан домоди хурдияш Отабек Умаров ки муовини раиси хадамоти бехатарии раисҷумҳур мебошад ба ҳамагон намоён гардид. Масалан, вақтҳои охир дар сомонаҳои иҷтимоӣ наворҳои видеоӣ бо иштироки домоди раисҷумҳур паҳн гардид, ки дар он Отабек Умаров варзишгарон ва блогерони русро дар Ӯзбекистон аз ҳисоби маблағҳои буҷавӣ, инчунин вазирон ва ё ин ки раисҷумҳурони кишварҳоро бо кортежҳои дароз иборат аз мошинҳои гаронбаҳо роҳҳоро баста пешвоз мегирад.
Ёдрас мекунем, ки айнан чунин тарзи зиндагиро духтарони собиқ раисҷумҳур Каримов ба сар мебурданд, ки духтари калонияш алҳол мӯҳлати адои ҷазо менамояд, ки пас аз вафоти падараш ҳукм карда шудааст.
Маҳмуд Абдулмӯъмин, блогери ӯзбек ҳодисаи мазкурро чунин шарҳ медиҳад:
«Якум, агар масъалаи бо кадом маблағ Хумо Арена сохта шудааст омӯхта бароем, аён мегардад, ки миллиардҳои сарфшуда ин маблағҳои мардум мебошад. Ба касе пӯшида нест, ки дар бинои мазкур дилхушиҳои гуногуне гузаронида мешавад, ки Ислом онро сарзаниш менамояд. Ба масъалаи духтарон, домодҳо ва мансабдорони раисҷумҳур оем, маблағҳои гӯшношуниде, ки онҳо барои дилхушиҳояшон сарф мекунанд на аз ҳисоби худ, балки аз ҳисоби буҷаи давлат сарф менамоянд, кори мазкур барои ҳокимони кишварҳои Осиёи Марказӣ ва наздиконашон кори одатӣ шудааст.
Дуюм, раисҷумҳур қариб дар ҳамаи баромадаш бо овози баланд дар хусуси Ислом ва диндории мардуми Ӯзбекистон ҳарф мезанад, ҳол он ки дар Хумо Арена занҳои ним бараҳна дар ях рақс мекунанд ва дар онҷо нӯшокиҳои спиртдор нӯшида мешавад. Корҳои мазкурро дини Ислом дар ҳеҷ ваҷҳ қабул надорад ва ба маданият ва урфу одатҳои мардуми ин минтақа зид мебошад».
