Мирзиёев дар бораи дохил шудан ба ИИАО (Иттиҳоди иқтисодии Аврупо ва Осиё) андеша мекунад
Муовини вазири корҳои хориҷии Ӯзбекистон Илҳом Неъматов иброз дошт, ки режими Мирзиёев имкони дохил шуданро ба ИИАО (Иттиҳоди иқтисодии Аврупо ва Осиё) баррасӣ мекунад. Ӯ дар ин бора зимни мусоҳибаи худ бо оҷонсии РИА Новости эълон кард. Неъматов дар гуфтугӯ бо хабарнигорон чунин иброз дошт: «Ҳоло ин масъала мавриди омӯзиш қарор дорад, дар мавриди омӯзиши дақиқ. Баъдтар ин омӯзиш баррасӣ хоҳад шуд ва табиист, ки қарор қабул карда мешавад».
Дар навбати худ, намояндаи мухолифати Ӯзбекистон Муҳаммад Солеҳ, ки сарварии «Ҳаракати халқии Ӯзбекистон»-ро бар ӯҳда дорад, 27 декабр дар сомонаи худ бо муроҷиат ба тариқи видеоӣ баромад намуд. Ба андешаи сиёсатмадори мухолиф, дохил шудани Ӯзбекистон ба ИИАО (Иттиҳоди иқтисодии Аврупо ва Осиё) таҳдиди сиёсӣ барои кишвар ба ҳисоб меравад. Сиёсатмадори мухолиф чунин мепиндорад: «Ҳатто диктатор Каримов соли 2014 гуфта буд, ки дохил шудани Ӯзбекистон ба ИИАО (Иттиҳоди иқтисодии Аврупо ва Осиё) таҳдид ба истиқлолият ба шумор меравад. Аммо Мирзиёев мехоҳад ин масъаларо чунон ҳал намояд, ки ба қавле «на сих сӯзаду на кабоб». Чунон менамояд, ки ӯ ба андешаи худ назар ба устодаш сиёсати оқилонатарро пеш мебарад. Ӯ барқвор қарореро пазируфт, ки халқашро бидуни гирифтани розигияш ба тангӣ мекашад». Муҳаммад Солеҳ дар баёнияи худ мегӯяд: «Бо ибораи дигар, корманди ҳукумат мегӯяд, ки ҳукумат дар бораи таъмини аҳолии афзоишёбанда бо кор сари худро ба дард намегузорад. Илҳом Неъматов бо ваҷд мегӯяд: «Мо аҳолиро барои муҳоҷират омода месозем, ҳимояи ҳуқуқҳои онҳоро ба департаменти муҳоҷирати кишвари ҳамсоя месупорем. Ин департамент аҳолии моро бо ҳуқуқҳои муҳоҷир ошно месозад, «шароит фароҳам меорад», то ӯ аз гуруснагӣ намирад». Ин аст ҳалли муаммо ва ин аст сиёсати миллии Мирзиёев!»
