Сокини шаҳри Душанбе барои ҳиҷоб мубориза мебарад
Чи тавре ки радиои Озодӣ менависад, сокини шаҳри Душанбе Нилуфар Раҷабова, ки ҳангоми рейд алайҳи ҳиҷоб боздошт шуда буд ва барои майдаавбошӣ ҷарима шудааст, алайҳи кормандони полис ба Прокуратураи генералии Тоҷикистон шикоят кард. Раҷабова қаблан гузориш дода буд, ки ҳангоми рейд, сониян дар шӯъбаи милисаи ноҳияи Сино-2 ӯро кормандони полис таҳдид ва таҳқир кардаанд.
18-уми декабр додгоҳи ноҳияи Синои шаҳри Душанбе Нилуфар Раҷабоваро барои вайронкунии моддаи 460 (майдаавбошӣ) Кодекси ҳуқуқвайронкунии маъмурӣ ҶТ айбдор дониста ба маблағи 550 сомонӣ ($56) ҷарима баст. Нисбати Нилуфар Раҷабова бар асоси шикояти Рано Абдуллоеваи иштирокчии рейд ва мудири шӯъбаи занон ва оилаи ноҳияи Синои пойтахт парвандаи маъмурӣ оғоз гардид. Мансабдор дурӯғ гуфт ва изҳор дошт, ки Раҷабова ӯро ҳамчун намояндаи ҳукумат ҳангоми иҷрои вазифаҳои хизматияш таҳқир кардааст.
Вале, Нилуфар Раҷабова тасдиқ намуд, ки аз иштирокчиёни рейд касеро таҳқир накардааст. «Баръакс — дар давоми якчанд соате, ки дар бинои ШВКД Сино-2 гузаронидам, маро таҳқир ва таҳдид намуданд», — гуфт ӯ ба хабарнигорон.
Эътилофи ҷомеаи шаҳрвандӣ алайҳи шиканҷа ва беҷазоӣ дар Тоҷикистон ба Нилуфар Раҷабова дар мурофиаи судӣ бо коркунони ШВКД Сино-2 шаҳри Душанбе ёрии ҳуқуқӣ хоҳад кард. «Ба прокуратураи генералӣ даъвои худро арз кардам, даъвоямро қабул карданд», — изҳор намуд ӯ санаи 20-уми декабр.
Рӯзи панҷшанбе Вазорати корҳои дохилии Тоҷикистон тасдиқ намуд, ки нисбати Нилуфар Раҷабова бар асоси даъвои Рано Абдуллоева, ки гӯё ӯро Нилуфар бо суханҳои қабеҳ таҳқир намудааст, парвандаи маъмурӣ боз карда шуд. Дар он замон Нилуфар Раҷабова иҳзор намуд, ки «Ҷаримаро пардохт накардам. Зеро ҳамчун модари фарзандҳои маъюб 540 сомонӣ нафақа мегирам. Ин маблағ барои пардохти ҷаримаи аз тарафи додгоҳ муайяншуда кифоя нест», — мегӯяд ӯ.
Ёдрас мекунем, ки санаи 14-уми декабр Раҷабова аз беморхона ба манзили зист меомад. Дар роҳ ӯро намояндагони Кумитаи оид ба корҳои занон ва коркунони полис дастгир намуданд, ки ӯро бо чор зани дигари ҳиҷобдор ба шӯъбаи полиси ноҳияи Сино барои гузаронидани ба ном «сӯҳбати тавзеҳӣ» бурданд.
