Русия: шаҳрванди Тоҷикистон ба 22 соли зиндон маҳкум гардид
Муҳоҷири меҳнатӣ аз Тоҷикистон Эмом Бурҳонов аз тарафи додгоҳи ҳарбии шаҳри Маскав бо парвандаи бофташудаи ташкили садамаи қатораи «Сапсан» тобистони соли 2017, ба мӯҳлати 22 соли зиндон маҳкум гардид.
Бурҳонов дар ташкили амалиёти террористӣ бо ҳамроҳи гурӯҳи муташаккил, ташкил намудани ҷамъияти террористӣ, ғайриқонунӣ ба даст овардани силоҳ ва маводи таркиш айбдор дониста мешавад. Муддати адои ҷазоро ӯ дар колонияи низомаш сахт мегузаронад.
Ба гуфтаи хадамоти қудратии рус, 13 июли соли 2017 айбдоршвандагон сохти махсуси оҳаниро ба роҳи оҳан ҷойгир намуданд. Қатораи «Сапсан» аз шаҳри Маскав омада истода ба сохти мазкур бархӯрд намуд, аз ин лиҳоз панҷ вагони он осеб дид.
Тобистони соли 2019 додгоҳи ҳарбии шаҳри Маскав оиди парвандаи мазкур қарор намуд, ки дар натиҷаи он Бобоёров Муҳаммади, Ҷумахон Баймонов, Фарҳод Наҷбудинов, Суҳробҷон Нозимов, Фарҳодҷон Нозимов, Абдуғаффор Раупов ва Амроҷон Раупов ба мӯҳлатҳои аз 15 то 21 соли маҳрумият аз озодӣ маҳкум шуданд. Панҷ нафари маҳкумшудагон айби ба онҳо эълон шударо рад намуданд.
Бурҳонов дар суд изҳор намуд, ки кормандони Хадамоти Федеролии Амниятӣ дар вақти дастгиркунӣ селитраи аммиакиро ва хокаи алюминиро ба ӯ ҳавола намуданд.
Бояд қайд намуд, ки муҳоҷирони меҳнатӣ аз Осиёи Миёна барои хадамотҳои қудратии рус чун зоғи сиёҳ буда, охирин аз ҳисоби парвандаҳои бофташуда ба сӯи мансаби боло пешравӣ карда, аз ҳисоби буҷаи давлат маблағи олиҳиммат мегиранд. Хусусан солҳои охир ба таҳририяти «Хабарҳо» аз тарафи муҳоҷирони дар Русия кору фаъолият карда истода маълумотҳо омада истодааст, ки нисбати онҳо ва ё наздиконашон парвандаҳои бофташуда кушода шуда истодааст. Аз ин рӯ, мушоҳидон гумон доранд, ки Бурҳонов ва дигар маҳкумшудагон эҳтимол қурбониҳои навбатии хадамотҳои махсуси Русия гардиданд.
