ВКД ҶТ: даҳҳо мадрасаҳои хонагӣ
Вазорати корҳои дохилии Тоҷикистон дар гузориши солонааш, ки «Садои мардум» нашр кардааст, аз ошкор шудани 38 мавриди омӯзиши ғайриқонунии динӣ дар соли гузашта хабар медиҳад. Дар ҳама маврид кӯдакон аз ҳамсояҳо ё имомхатибони маҳаллӣ дарси динӣ мегирифтанд, ки ин хилофи қонун аст гуфта мешавад дар гузориш.
Қобили зикр аст, ки пас аз қабули қонун дар моҳи марти соли 2009 дар бораи озодии виҷдон ва иттиҳодияҳои динӣ, таълими дин дар манзили зист ғайриқонунӣ гардид. Муддате иддае аз имомхатибон бо иҷозати Кумитаи дини назди ҳукумати Тоҷикистон дар масҷид ба кӯдакон асосҳои дини Исломро таълим медоданд.
Моҳи августи соли 2016 охирин мадраса баста шуд ва гирифтани иҷозат барои таҳсилот номумкин гардид. Дар ҳоли ҳозир, тибқи қонунгузории Тоҷикистон, танҳо волидайн ҳақ доранд, ки ба фарзандони худ таҳсили динӣ диҳанд, аммо мутаассифона, сатҳи дониш дар бораи Ислом дар Тоҷикистон ба ҳадде аст, ки на ҳама волидайн метавонанд ба фарзандонашон асосҳои Исломро биомӯзонанд.
