Самарқанд: 15 рӯзи ҳабс барои таълими Қуръон
Додгоҳи вилояти Самарқанд қарори марбут ба сокини маҳаллӣ Аслиддин Худойбердиевро, ки барои таълими ғайриқонунии дин ба кӯдакони ноболиғ ба 15 рӯзи ҳабс маҳкум шудааст, бетағйир гузошт, гуфт вакили мудофеъ Абдувоҳид Ёқубов ба хабаргузории «Озодлик».
Ёдрас мекунем, ки Аслиддин Худойбердиев аз ҷониби кормандони Шӯъбаи корҳои дохилии ноҳияи Пахтачии вилояти Самарқанд ҳангоми рейд дар масҷиди «Хӯҷа Зиевуддин» рӯзи 25 май боздошт шуда буд.
Ба гуфтаи кормандони амниятӣ, ҳангоми бозрасии масҷид маълум шуд, ки ба 11 нафар (панҷ нафарашон ноболиғон) бидуни иҷозати мақомоти марказии идораи дин таълими динӣ дода шудааст.
Аслиддин Худойбердиев тавонистааст, рейдро ба навор гирад ва онро дар шабакаҳои иҷтимоӣ паҳн кунад. Дар навор дида мешавад, ки чӣ гуна якчанд нафар корманди ҳифзи ҳуқуқ ба масҷид даромада, ба бозпурсӣ кардани кӯдакон ва калонсолоне, ки дар он ҷо таълими динӣ мегиранд, шурӯъ мекунанд. Яке аз маъмурони амниятӣ як кӯдаки 9-10-соларо дар бораи коре, ки дар масҷид мекунад, бозпурсӣ мекунад, дафтарашро тафтиш мекунад ва он чиро, ки дар он навишта шудааст, мепурсад ва сипас халтаи кӯдакро меҷӯяд.
Сипас худи ҳамон корманди амниятӣ кӯдакон ва калонсолони дар масҷид ҳузурдоштаро дар бораи хатари гирифтани таълими динӣ «аз муллоҳои камсавод, ки иҷозатнома барои фаъолияти таълимӣ динӣ надоранд» огоҳ намуд, инчунин аз хатари афтидан ба ҷараёнҳои мамнӯи динӣ ёдрас кард.
Каме дуртар овози Аслиддин Худойбердиев шунида мешавад, ки аз корманди амниятӣ бозпурсии як ноболиғро дар масҷид изҳори норозигӣ намуда, кӯдакро ҳушдорӣ медиҳад, ки ба саволҳои ӯ посух надиҳад. Худойбердиев инчунин кӯшиш намуда тавзеҳ медиҳад, ки кӯдакон дар масҷид маълумоти динӣ намегиранд, балки танҳо алифбои арабиро меомӯзанд ва бозпурсии кӯдак дар набудани волидайнаш ғайриқонунӣ мебошад.
Собиқ имоми масҷиди ҷомеи «Омина» -и шаҳри Тошканд Фазлиддин Парпиев, ки ҳоло берун аз қаламрави Ӯзбекистон зиндагӣ мекунад, дар пости худ дар ин масъала амалҳои кормандони ҳифзи ҳуқуқро ба амалҳои саҳюнистон, ки ба масҷиди Ақсо ҳамла карданд, баробар кард.
“Гурӯҳи ҷосусони саҳюнистӣ ба масҷид ҳамла карда, кӯдакони хурдсолро тарсониданд ва бозпурсӣ карданд, ба онҳо ҳамчун ҷинояткор муносибат карданд ва ба онҳо фишори равонӣ расониданд.
Ва ин ҳама на дар Ерусалим, балки дар Самарқанд, ки маркази таърихии олимон аст, рух дод», — гуфт ӯ.
